Svo gæti farið að Jack Wilshere verði orðinn leikmaður West Ham áður en langt um líður. Sky Sports greinir frá því í dag að West Ham hafi áhuga á þessum 26 ára miðjumanni. Wilshere staðfesti á dögunum að hann væri á leið frá Arsenal en samningur hans rennur út í sumar.
Wilshere hefur leikið allan sinn feril með Arsenal en á undanförnum árum hafa meiðsli sett stórt strik í reikninginn. Hann var lánaður frá félaginu um tíma en sneri aftur á síðustu leiktíð og kom við sögu í 38 leikjum á tímabilinu sem var að ljúka. Wilshere lék 125 deildarleiki fyrir Arsenal og var um tíma talinn einn allra efnilegasti knattspyrnumaður Bretlandseyja. Hann á 34 landsleiki að baki fyrir England.
