Sara Mansour sem verðlaunuð hefur verið fyrir framlag sitt til barna, heimsfriðar og mannréttindamála gagnrýnir íslensku þjóðina.
99,6 prósent af þeim Íslendingum sem horfðu á sjónvarp á laugardaginn frá 13:00 til 15:00 horfðu á leik Íslands og Argentínu á HM.
Sara virðist ekki hafa verið einn af þeim Íslendingum enda eru mannréttindamál henni hugljúf. Íslenskir ráðamenn slepptu því að mæta á HM í Rússlandi. Ástæðan var efnavopnaárás í bæ á Englandi fyrr á þessu ári á fólk frá Rússlandi.
Margir hafa gagnrýnt ráðamenn landsins fyrir að fara ekki í harðari aðgerðir eins og að vísa embættismönnum frá Rússlandi úr landi. Það hafa margar þjóðir gert. Sara segir að íslenska þjóðin verði að gera meira en að bara gagnrýna hlutina.
,,Það er ekki bara á ábyrgð opinberra einstaklinga að sniðganga HM. Mér sýnist eins og allir, sem hafa vikum saman gagnrýnt aðgerðaleysi íslenskra stjórnvalda og landsliðsins, hafi horft á leikinn,“ skrifar Sara á Twitter síðu sinni.
Ljóst má þó vera að íslenska þjóðin var ekki að styðja aðgerðir Rússlands heldur að styðja íslenska karlalandsliðið í fótbolta sem er sameiningartákn þjóðar. Landsliðið hefur gert magnaða hluti með því að kynna allt það góða sem Íslendingar standa fyrir. Líklega besta og stærsta landkynning sem komið hefur fyrir okkur.
Eins og fyrr segir eru mannrétindi það málefni sem brenna á vörum Söru og hún hefur sem dæmi sniðgengið Eurovison í nokkur ár. ,,Ég er búin að sniðganga Eurovision í þrjú ár. Ég vona að á fjórða árinu mínu verði ég ekki sú eina sem situr inni í herbergi meðan fjölskylda og vinir eru frammi að horfa og borða nammi. Ég treysti því að þið verðið með mér í “Anti-Eurovision” partýi,“ skrifar Sara á Twitter á dögunum.
