„Menning, stemning, saga, bjór – þetta er klikkað, allt eins og það á að vera,“ segir Kristján „Maradona“ Ingólfsson sem var í góðu skapi í Volgograd í dag þegar 433.is kíkti á Fan Zone. Íslendingar eru farnir að tínast til borgarinnar en gert er ráð fyrir um tvö þúsund Íslendingum á leikinn gegn Nígeríu á morgun.

Talvert hefur verið rætt um skordýrafaraldur í borginni að undanförnu og hefur umræðan einkum snúist um mýflugur annars vegar og moskítóflugur hins vegar. Kristján segist ekki hafa miklar áhyggjur af þeirri umræðu. „Ég er búinn að sjá tvær og ég drap þær báðar.“

Kristján segist bjartsýnn fyrir leikinn á morgun. „Ég er búinn að tala við þrjá mismunandi Guði og töfralækni um daginn og við erum að vonast til að lækka hitann í veðrinu aðeins. Ég held að 3-1 fyrir Ísland verði sanngjörn úrslit.“

Eyjólfur Vestmann Ingólfsson var einnig bjartsýnn en hann var í stúkunni þegar Ísland gerði jafntefli við Argentínu í fyrsta leik okkar í keppninni. Hann segist þó hafa viljað vinna þann leik, eðlilega, og gerðist svo djarfur að spá því að Ísland færi alla leið í úrslitaleik mótsins gegn Þjóðverjum.

Gunnlaugur Þorgeirsson segist hafa spáð því fyrir leik Íslands og Argentínu að hann myndi enda með jafntefli, 1-1. Hann segist ekki eiga von á öðru en að Ísland vinni Nígeríu, 2-1 og fari upp úr riðlinum.

Spjallið við þessa þrjá hressu stuðningsmenn má sjá hér að neðan: