Heimir Hallgrímsson landsliðsþjálfari Íslands vill bíða með að skrifa undir nýjan samning við KSÍ.

Hann bíður og sér hvort spennandi tilboð komi upp svo hann geti farið í annað starf.

Ljóst er að KSÍ þarf að skoða þjálfaramálin fyrir HM enda þarf að vinna fram í tímann me svona stórt starf.

„Þegar HM lýkur er ég búinn að vera í sjö ár í vinnu hjá A-landsliði karla. Það er helmingi lengur en það lengsta hingað til. Mig langar að sjá hvort það sé eitthvað annað í boði,“ sagði Heimir í Návígi með Gunnlaugi Jónssyni sem birtist á Fótbolta.net í dag.

„Mig langar að vera áfram og auðvitað myndi ég vilja hafa það þannig að ég gæti bara ákveðið það sjálfur eftir HM hvort ég verði áfram eða ekki. Samningurinn minn væri tilbúinn og enginn ráðinn í staðinn. Ég veit að þannig er þetta ekki í dag. Ég er að taka smá áhættu með því að fá að biðja um það að fá að bíða með þetta.“