Jurgen Klopp, stjóri Liverpool, var ekki nógu sáttur með sína menn í dag í markalausu jafntefli við Manchester United.

Liverpool hefur oft spilað betur en í dag en liðið fékk nánast engin færi í leiknum.

Klopp viðurkennir það sjálfur en segir einnig að hann sé nokkuð vonsvikinn með að fá aðeins eitt stig.

,,Okkur gæti liðið eins og við höfum unnið eitt stig eða tapað tveimur. Við byrjuðum nákvæmlega eins og við vildum,“ sagði Klopp.

,,Við fengum engin færi og United fékk aðeins eitt þegar Alisson átti frábæra vörslu í markinu.“

,,Fyrir utan það þá voru þetta föst leikatriði. Það hélt leiknum opnum en við sköpuðum ekki nógu mikið og það er sannleikurinn.“

,,Við spiluðum ekki nógu vel. Við tökum þetta samt. Þetta er eitt stig og við erum með stigi meira en áður þó að okkur líði ekki þannig.“

,,Þessir leikir breytast alltaf með einu atviki. Strákarnir voru ekki í lagi í dag. Ég gat séð það í andlitunum þeirra.“

,,Þetta var skrítið. Ég hugsaði ‘hvað er í gangi hér í dag?’. Þeir misstu taktinn við leikinn og gátu ekki náð honum aftur.“