Sebastian Boxleitner, hefur látið af störfum sem styrktarþjálfari íslenska karlalandsliðsins. Hann greindi frá því í vikunni. Í samtali við Vísir.is segist Boxleitner hafa verið rekinn.
Boxleitner var ráðinn til starfa eftir Evrópumótið í Frakklandi og var tvö og hálft ár í starfi.
Boxleitner var hins vegar aldrei með samning við KSÍ, aðeins var munnlegt samkomulag sem Geir Þorsteinsson, þá formaður KSÍ gerði við hann.
„Ég var bara rekinn,“ segir Boxleitner í samtali við Vísi og ítrekaði að hann hefði viljað vera áfram.
Eitthvað hefur Erik Hamren haft að segja um málið en Boxleitner segir að Hamren hafi ekki verið sáttur með sig.
„Erik sagði að vandamálið væri að samningurinn minn væri að renna út í febrúar en ég var aldrei með samning og það kom honum á óvart. Þá fór hann að tala um að þetta væri af fjárhagslegum ástæðum en ég komst aldrei í það að ræða um peninga.“
Boxleitner segist að það hafi reynst honum erfitt að fá svör frá KSÍ um framtíðina og hann hafi ítrekað reynt að ná á Guðna Bergsson, formann sambandsins.
„Erik sagðist vera óánægður með upphitunaræfingar mínar en alltaf þegar að við unnum saman sagðist hann vera ánægður með allt. Ég vildi endilega fá að vita hverju hann vildi breyta og þá sagði Erik að til hefði staðið hjá honum að ræða þetta við mig fyrir leikina í undankeppni EM í mars. Það var eins og hann væri að búast við því að ég yrði áfram en svo verður greinilega ekki.“
