Það var hart tekist á í morgunþættinum á Rás 2 í morgun er þeir Guðni Bergsson og Geir Þorsteinsson mættu í viðtal.
Geir og Guðni bjóða sig báðir fram í formannskjöri KSÍ en ársþing sambandsins fer fram næsta laugardag.
Geir hætti sem formaður fyrir tveimur árum og tók Guðni við. Hann segist nú vera með nýjar hugmyndir og vill taka við á ný.
Útlit er fyrir að Geir sé ekki sammála stefnu Guðna og vill breyta ákveðnum hlutum innan sambandsins.
Fyrrum handboltamaðurinn, Logi Geirsson, spyr sig að því hvort Geir geti nefnt tvo hluti sem Guðni hefur gert rangt í starfi.
Guðni hefur þótt sinna starfinu nokkuð vel og var lengi búist við að hann fengi enga samkeppni.
Geir gagnrýndi á meðal annars þá ákvörðun Guðna og KSÍ að ráða Erik Hamren til starfa sem landsliðsþjálfara. Geir hefði gengið öðruvísi að hlutunum.
,,Ég mun starfa með þeim þjálfurum sem starfa hjá knattspyrnusambandinu, maður veit aldrei hvað gerist í fótbolta. Þegar ég lít á ráðningu Erik Hamren, það eru vinnubrögðin,“ sagði Geir.
,,Það hefði verið uppskrift að það myndi ganga illa ef Jose Mourinho yrði ráðinn fjórum vikum fyrir leik, ég hefði kannski farið aðrar leiðir. Í fótbolta er líftími þjálfara mánuður eða tíu ár.“
Guðni svaraði fyrir sig og segir að það hafi verið kominn tími á Geir, að hann hafi gert rétt með að stíga til hliðar.
,,Það hefur margt breyst til batnaðar, það var kominn tími á Geir. Hann var búinn að vera þar í 25 ár, hann á að horfa fram,“ sagði Guðni.
,,Hann hefði frekar átt að koma með sínar hugmyndir til formannsins sem heiðursformaður, hann á sinn þátt í því sem verið hefur gert. Ég er ekki að taka það af honum, hann má eiga það sem hann á. Hans tími er kominn að mínu viti.“
Eins og kom fram fer ársþing KSÍ fram um helgina og kemur þá í ljós hver hefur betur í kjörinu.
Getur Geir nefnt 2 atriði sem Guðni hefur gert illa í starfi?#KSIformadur
— Logi Geirsson (@logigeirsson) 6 February 2019
Hvað hefur Geir gert fyrir KSÍ síðan hann varð Heiðursformaður fyrir 2 árum?
Samkvæmt 43. grein í lögum KSÍ hefur heiðursformaður rétt til setu og málfrelsi á stjórnarfundum KSÍ og kemur fram fyrir hönd sambandsins þegar stjórn þess óskar eftir.#KSÍformaður— Logi Geirsson (@logigeirsson) 6 February 2019
