Arda Turan, leikmaður Barcelona, gæti verið á leið í 12 ára fangelsi samkvæmt tyrknenskum fjölmiðlum.

Turan er þessa stundina á mála hjá Istanbul Basaksehir í heimalandinu en hann er þar í láni.

Hann komst í fréttirnar á síðasta ári fyrir að ráðast á poppstjörnuna Berkay Sahin á næturklúbbi.

Sahin nefbrotnaði eftir árás Turan en söngvarinn segir að hann hafi látið ljót ummæli falla um eiginkonu sína.

Einnig var talað um að Turan hafi mætt með byssu upp á spítala til að biðja Sahin fyrirgefningar og bað hann um að skjóta sig.

,,Ég vissi ekki að hún væri eiginkona þín. Fyrirgefðu. Skjóttu mig ef þú vilt,“ á Turan að hafa sagt við Sahin.

Málið er nú í vinnslu hjá yfirvöldum en fjórar kærur hafa verið lagðar fram á hendur leikmannsins.

Spænskir og tyrkneskir miðlar tala um að Turan gæti fengið allt að þriggja til 12 ára fangelsisdóm.