Hlaðvarpsþátturinn, 90 mínútur hefur hafið göngu sína en um er að ræða þátt sem Hörður Snævar Jónsson, ritstjóri 433.is stýrir.

Rætt verður um fótbolta við áhugaverða gesti í vetur, farið verður um víðan völl.

Gestur þáttarins að þessu sinni er Jóhann Berg Guðmundsson sem hefur verið einn besti knattspyrnumaður Íslands síðustu ár.

Jóhann segir skemmtilega sögu er hann spilaði undir stjórn Karel Fraeye hjá Charlton í næst efstu deild.

Gengið undir Fraeye var virkilega slæmt og var hans síðasti leikur við stjórnvölin 6-0 tap gegn Huddersfield.

Nýir menn höfðu komið inn og leit liðið vel út, þar á meðal Roger Johnson sem lék um tíma í ensku úrvalsdeildinni.

Johnson hafði mikla trú á liðinu fyrir leik gegn Huddersfield og sagði bróður sínum að leggja smá pening undir að þeir myndu vinna.

Það gekk ekki eins og í sögu en Charlton tapaði leiknum sannfærandi 6-0 og var Fraeye rekinn stuttu síðar.

,,Við spiluðum gegn Huddersfield úti, ég var með Roger Johnson í liði, hann hafði spilað í úrvalsdeildinni og var toppmaður,“ sagði Jóhann.

,,Hann sagði við bróður sinn: ‘Skelltu pening á okkur, liðið lítur vel út í dag.“ Þá vorum við búnir að safna einhverju liði, Roger Johnson og einhverjir svona gæjar voru komnir inn og enginn var meiddur og allt klárt.“

,,Hann segir við bróður sinn að skella nokkrum pundum á okkur, að við litum vel út og að við myndum vinna. Við töpuðum 6-0! Þjálfarinn vissi að þetta væri hans síðasti leikur.“

,,Hann var brotinn í rútunni eftir leik. Hann vissi að hann væri búinn og svo var hann rekinn.“