Hlaðvarpsþátturinn, 90 mínútur hefur hafið göngu sína en um er að ræða þátt sem Hörður Snævar Jónsson, ritstjóri 433.is stýrir.

Rætt verður um fótbolta við áhugaverða gesti í vetur, farið verður um víðan völl.

Gestur þáttarins að þessu sinni er Jóhann Berg Guðmundsson sem hefur verið einn besti knattspyrnumaður Íslands síðustu ár.

Jóhann gekk í raðir Burnley árið 2016 en hann hafði fyrir það spilað með Charlton í næst efstu deild.

Charlton var fallið úr Championship-deildinni fyrir leik gegn einmitt Burnley tímabilið 2015/2016.

Jóhann ætlaði sér aldrei að spila þann leik en þá var stutt í að EM í Frakklandi myndi hefjast þar sem íslenska landsliðið tók þátt.

Hann var sannfærður um að taka þátt í leiknum að lokum og sér alls ekki eftir því í dag en Burnley sýndi honum mikinn áhuga eftir góða frammistöðu í lokaleiknum.

,,Það var fullt af einhverjum þreifingum en svo kemur Burnley inn í þetta. Við spiluðum gegn Burnley í síðasta deildarleiknum og þeir voru búnir að tryggja sig upp og vinna deildina,“ sagði Jóhann Berg.

,,Ég spilaði mjög vel í þeim leik þó ég segi sjálfur frá. Ég ætlaði ekki að spila þennan leik. EM var að koma og ég hafði talað við þjálfarann og sagði að ég hefði engu að spila og að við værum fallnir og að EM væri að koma, ég vildi ekki meiðast.“

,,Hann sagði mér að spila allavegana 60 mínútur og ég ákvað þá að spila. Ég spilaði mjög vel og það er ein af ástæðunum að Burnley keypti mig. Það er eins gott að ég spilaði þennan leik!“

,,Það var alltaf einhver áhugi en þessi leikur hjálpaði mikið og svo líka EM, íslenska landsliðið spilar oft svipaðan bolta og Burnley. Það var einhver áhugi fyrir en þessi leikur hjálpaði mikið.“