Framherjinn Emiliano Sala er týndur þessa stundina en hann var farþegi í flugvél sem ferðaðist frá Nantes til Cardiff á dögunum.

Flugvélin hvarf óvænt af radar um kvöldið og er í raun alveg óljóst hvað hefur átt sér stað.

Lögreglan á Englandi leitaði að Sala og flugmanninum David Ibbotson í þrjá daga en leitin skilaði engum árangri.

Það ríkir mikil sorg í knattspyrnuheiminum en Sala var nýbúinn að skrifa undir samning við Cardiff.

Sky Sports greinir nú frá því að Sala hafi sjálfur leitað að flugi áður en honum var boðið sæti í lítilli einkaflugvél.

Það var Jack McKay, leikmaður Cardiff, sem bauð Sala sæti í flugvélinni fyrir fyrstu æfingu daginn eftir.

McKay er 22 ára gamall sóknarmaður Cardiff en hann hefur ekkert komið við sögu á tímabilinu.

Faðir hans, Willie McKay er umboðsmaður og spilaði stórt hlutverk í að koma Sala frá Nantes til Cardiff fyrir 15 milljónir punda.