Liverpool hefur gert ófá slæm leikmannakaup síðustu ár og er hægt að nefna þónokkra leikmenn.
Leikmenn eins og Mario Balotelli, Loris Karius, Ragnar Klavan, Christian Benteke, Danny Ings og Nathaniel Clyne.
Einn leikmaður stendur þó upp úr og gæti mögulega verið verstu kaup Liverpool síðan enska úrvalsdeildin hófst.
Blaðamaðurinn Neil Jones hjá Goal fjallar um vængmanninn Lazar Markovic sem er enn á mála hjá félaginu.
Markovic var keyptur til Liverpool fyrir 20 milljónir punda árið 2014 en han var áður á mála hjá Benfica.
Jones spyr sig hvort Markovic séu verstu kaup í sögu liðsins en hann hefur ekki spilað leik frá árinu 2015.
Serbinn hefur verið lánaður til Fenerbahce, Sporting, Hull og Anderlecht þar sem lítið gekk upp.
Hann er enn skráður sem leikmaður Liverpool en hefur ekkert komið við sögu á tímabilinu og á enga framtíð fyrir sér á Anfield.
Undir Brendan Rodgers spilaði Markovic 34 leiki í öllum keppnum tímabilið 2014/2015 en það voru einu leikir hans fyrir félagið.
Markovic til varnar þá var hann oft notaður sem vængbakvörður en leið aldrei þægilega í þeirri stöðu.
Það virðist ganga illa hjá Liverpool að losa sig við Markovic sem var ekki lánaður til félags á þessu tímabili og æfir því aðeins með liðinu og spilar ekkert.
