Hlaðvarpsþátturinn, 90 mínútur hefur hafið göngu sína en um er að ræða þátt sem Hörður Snævar Jónsson, ritstjóri 433.is stýrir.

Rætt verður um fótbolta við áhugaverða gesti í vetur, farið verður um víðan völl.

Gestur þáttarins að þessu sinni er Hólmar Örn Eyjólfsson, landsliðsmaður Íslands í knattspyrnu hefur átt merkilegan feril þrátt fyrir ungan aldur.

Hólmar samdi við ísraelska félagið Maccabi Haifa árið 2017 en hann kom þangað frá Rosenborg í Noregi.

Þar stoppaði hann þó stutt og lék aðeins 16 leiki áður en hann var farinn til Levski Sofia í Búlgaríu.

Maccabi borgaði 1,5 milljón evra fyrir Hólmar og var búist við miklu af honum eftir kaupin.

,,Ég klára tímabilið með Rosenborg 20. nóvember, fer í bikarúrslit og fer svo heim og er í fríi í sex vikur þar sem ég var ekki að gera mikið,“ sagði Hólmar.

,,Ég kem þarna út í, ég hef verið helvíti duglegur í jólamatnum því ég var ekki í góðu standi og manni er bara kastað beint inn í þetta.“

,,Ég held að ég hafi verið búinn að æfa fimm sinnum þegar ég byrja fyrsta leikinn eftir sex vikna frí og það var helvíti strembið.“

,,Maður var ekki alveg upp á sitt besta og maður fékk að heyra það úti á götu. Þeir eru mjög blóðheitir þarna.“

,,Maður var spurður: ‘Bíddu varst þú ekki einn af dýrustu leikmönnunum okkar en samt fáum við enn á okkur mörk?’ og alls konar svona.“

,,Til að byrja með átti gagnrýnin aðeins rétt á sér en eftir tvo mánuði var ég farinn að spila ágætlega en bara eins og maður sér með fullt af leikmönnum, ef þeir fá einhvern stimpil á sig bara eins og Lovren skilurðu, þó að hann eigi góðan leik þá er hann bara með þennan stimpil á sér.“

,,Nýi þjálfarinn sem kom í staðinn var helvíti.. Guy Luzon. Það breyttist aðeins og ég vissi strax um sumarið að ég þyrfti að breyta til.“