Sverrir Þór Sverrisson eða Sveppi eins og hann er kallaður var gestur í hlaðvarpsþættinum Millivegurinn sem er í umsjón Arnórs Sveins Aðalsteinssonar og Bergsveins Ólafssonar.

Sveppi er landsmönnum kunnur en hann hefur lengi verið einn ástsælasti grínisti landsins og er þá góðvinur Eiðs Smára Guðjohnsen.

Sveppi og Eiður sáu um sjónvarpsþættina Gudjohnsen þar sem farið er yfir magnaðan knattspyrnuferil Eiðs.

Eiður lék með mörgum frábærum knattspyrnumönnum hjá Chelsea og fékk Sveppi að hitta stjörnurnar og hanga með þeim.

Í eitt skiptið fékk hann að gefa goðsögninni Gianfranco Zola selbita eftir að hann hafði tapað leik í körfubolta.

Zola var magnaður knattspyrnumaður á sínum tíma og var lengi talinn einn besti leikmaður ensku úrvalsdeildarinnar.

,,Það var mest kannski úti hjá Chelsea. Ég hékk dálítið með honum þar, þar voru þetta Zola, Lampard, Terry, Dennis Wise og Hasselbaink,“ sagði Sveppi.

,,Þeir voru geggjaðir sko, það eru allt geggjaðir gæjar. Zola er geggjaður sko. Hann er svo mikið legend í fótbolta.“

,,Við fórum heim til Zola og vorum heilan dag þar að horfa á fótbolta og svo fórum við út í körfubolta og vorum í asna.“

,,Sá sem tapaði asna þá mátti maður taka utan um hausinn á honum og gefa selbita í eyrað. Eins fast og maður gat.“

,,Mómentið þar sem ég stóð og hélt utan um hausinn á Gianfranco Zola og negldi í eyrað á honum, heima hjá honum. Það er priceless sko.“

,,Þetta var svo fallegt! Það var svo gaman að sjá hvað Eiður er huge. Maður gerir sér ekki almennilega grein fyrir því þegar maður þekkir hann svona vel og finnst hann bara vera rasshaus og allt þetta.“