Hlaðvarpsþátturinn, 90 mínútur hefur hafið göngu sína en um er að ræða þátt sem Hörður Snævar Jónsson, ritstjóri 433.is stýrir.

Rætt verður um fótbolta við áhugaverða gesti í vetur, farið verður um víðan völl.

Næsti gestur þáttarins er þjálfari HB í Færeyjum, Heimir Guðjónsson sem var lengi þjálfari FH hér heima.

Heimir ræðir viðkvæmt mál frá árinu 2014 er Stjarnan fagnaði meistaratitlinum eftir leik við FH í lokaumferðinni.

Það sauð allt upp úr eftir þann leik en dómararnir þóttu ekki standa fyrir sínu og tóku nokkrar furðulegar ákvarðanir.

Kassim Doumbia, leikmaður FH, missti til að mynda alveg stjórn á sér eftir leik og ætlaði að vaða í Kristinn Jakobsson dómara.

Heimir ræðir þetta mál í þættinum og þá sérstaklega þá ákvörðun að dæma rangstöðu á Steven Lennon í leiknum sem var kolrangur dómur.

,,Nú get ég talað um það! Það var glórulaust, þessi blessaði leikur. Dómara farsi frá upphafi til enda,“ sagði Heimir.

,,Það var ekki vítið sem Kassim fékk á sig, ekki rangstaðan þegar Óli Kalli skoraði.“

,,Þegar þú horfir á leiknn, á 75. mínútu er innkast og Jón Ragnar hendir boltanum inn. Vemmelund var hægri bakvörður og ég hafði sagt á fundi fyrir leikinn: ‘Engar áhyggjur þó Danni Laxdal stígi upp með vörnina, Vemmelund situr alltaf eftir.“

,,Svo kemur þetta atvik upp og ég held að Atli Guðna hafi flikkað boltanum á Lennon, Vemmelund var tíu metrum fyrir aftan þá og það var flaggað rangstaða.“

,,Á þeim tímapunkti á hliðarlínunni þá man ég eftir því að ég hafði áhyggjur í fyrsta skiptið í leiknum. Ég hugsaði að þetta gæti endað í einhverju basli í restina sem það gerði.“

,,Djöfull var gott að létta þessu af sér. Það var eitthvað bogið við þetta.“