Guðni Bergsson, formaður KSÍ var gestur í 90 mínútum, hlaðvarpsþætti okkar hér á 433.is.

Þátturin birtist á laugardag en þar fer Guðni yfir starf sitt hjá sambandinu, hann þarf að endurnýja umboð sitt í febrúar, þegar ársþing KSÍ fer fram.

Í sumar þurfti Guðni ásamt stjórn KSÍ að ráða inn nýtt þjálfarateymi hjá karlalandsliðinu. Erik Hamren tók starfið og Freyr Alexandersson var ráðinn aðstoðarþjálfari.

Rætt var um á götum bæjarins, hvort Freyr myndi hreinlega taka við liðinu. Leikmenn liðsins bera mikla virðingu fyrir honum og telja hann afar færan þjálfara. Fyrir þessu fann Guðni.

,,Ég tók stöðuna á lykilmönnum og auðvitað búinn að vera mikið í kringum liðið, þeir ræddu við mig líka. Það er stundum ágætt að vera fyrrverandi leikmaður, það er ákveðið bræðralag og tengsl, þó maður haldi fjarlægð,“ sagði Guðni í 90 mínútum.

,,Ég skynjaði það að leikmenn voru mjög hrifnir af Frey, fannst mikið til hans koma sem þjálfara og leikgreinanda.“

Íslenska liðið hefur ekki unnið leik undir stjórn Hamren en Guðni segir ánægju hafi ríkt með að Freyr skildi vera í teyminu.

,,Það var vinsæl ákvörðun að hann skildi koma meira inn í teymið, ég held að það sé mikil ánægja með það. Mér finnst það hafa virkað hingað til, þó úrslitin hafi ekki komið. Leikurinn gegn Frakklandi og fleiri góðir hlutir. Það var góð ákvörðun að fá Frey inn í teymið.“