Unai Emery, stjóri Arsenal, átti ekki frábæran feril sem knattspyrnumaður en hann lék lengst á ferlinum með smáliði Toledo á Spáni.

Leikmannaferill Emery entist í aðeins 14 ár en hann lagði skóna á hilluna árið 2004 þá 32 ára gamall.

Emery var aldrei gríðarlega hæfileikaríkur leikmaður og virtist aldrei hafa trú á verkefninu sem hann var í.

Hann segir athyglisverða sögu af sjálfum sér þar sem hann veðjaði eitt sinn á að sínir menn í Toledo myndu tapa næsta deildarleik.

,,Það fylgdi meiri sársauki mínum leikmannaferli frekar en ánægja. Ég var alltaf töluvert hræddur,“ sagði Emery.

,,Til að gefa ykkur dæmi, þegar ég var leikmaður Toledo þá fylltum ég og tveir vinir mínir alltaf út veðmálamiða.“

,,Eina helgina áttum við leik gegn Elche og ég veðjaði á að þeir myndu vinna því þeir voru sigurstranglegri og það var það eðlilega í stöðunni.“

,,Ég borgaði stelpunni sem þurfti að merkja miðann minn. Hún var stuðningsmaður Toledo.“

,,Hún starði á mig og spurði mig hvernig ég gæti veðjað á að Elche myndi vinna. Hvernig geturðu gert þetta?“

,,Ég lærði mína lexíu af henni. Hvernig gat ég verið að spila haldandi það að við myndum tapa?“