Gísli Eyjólfsson miðjumaður Breiðabliks var einn besti leikmaður Pepsi deildar karla í sumar.

Gísli var fastamaður í liði Blika sem endaði í öðru sæti í bæði Pepsi deildinni og Mjólkurbikarnum.

Erlend lið hafa lengi haft augastað á Gísla og í sumar gat hann farið til Lilleström í Noregi.

„Það var mjög óheillandi því ég ætlaði mér að verða bikarmeistari og Íslandsmeistari, svo ég hafði ekki áhuga á að fara eitthvað að láni á þessum tímapunkti,“ segir Gísli í viðtali við Morgunblaðið.

Fleiri norsk lið hafa sýnt Gísla áhuga en hann hefur ekkert sérstaklega mikinn áhuga á að fara til Noregs.

„Mér finnst það eiginlega ekki … en þá er maður samt eins og vanþakklátur krakki á jólunum. Auðvitað vill maður fara út frá Íslandi og prófa þetta. Þá get ég bara komið til baka ef það gengur ekki nægilega vel. En ég er ekki að stressa mig.“

Hann segir það nú undir Breiðablik og umboðsmanni sínum komið hvað gerist.

„Í fyrra var alltaf talað um að maður þyrfti að taka annað gott tímabil til að sýna stöðugleika, og mér finnst ég hafa sýnt hann. Núna er þetta undir umboðsmönnum og Breiðabliki komið. Það hefur verið stefnan síðan maður var lítill að fara í atvinnumennsku og það er kannski raunhæfara nú en áður,“ sagði Gísli við Morgunblaðið.