Freyr Alexandersson, aðstoðarlandsliðsþjálfari segir að samvinna hans með Erik Hamren gangi með ágætum.

Erfiðlega hefur gengið hjá þeim félögum í byrjun en íslenska liðið hefur tapað öllum þremur leikjum sínum í Þjóðadeildinni. Liðið hefur fengið á sig 11 mörk og skorað eitt.

Freyr segir að nálgun Hamren á leikinn sé öðruvísi en við Íslendingar þekkjum.

„Þetta tekur tíma. Ég þekkti manninn lítið sem ekkert þegar við byrjuðum að vinna saman og eins og strákarnir eru búnir að segja í viðtölum þá er hann mikið í að tala við leikmenn,“ sagði Freyr á Stöð2 Sport.

Hamren vill mikið setjast niður með leikmönnum og fara yfir sviðið þannig.

„Hann er með öðruvísi nálgun en við þekkjum. Hann er mjög mikið í einn á einn. Hann gefur mikið „feedback“ og það er öðruvísi áreiti. Samvinnan gengur vel en við erum enn að læra á hvor annan.“