Það er óhætt að segja að tímabil FH í Pepsi-deild karla hafi verið ákveðin vonbrigði en liðið hafnaði í fimmta sæti í sumar.

FH hefur undanfarin 15 ár alltaf komist í Evrópukeppni en árangur liðsins var heilt yfir slakur í ár.

Jón Rúnar Halldórsson, formaður knattspyrnudeildar FH, viðurkennir það að ákveðin vonbrigði hafi fylgt sumrinu.

,,Við erum allavegana ekki þar sem við ætluðum okkur að vera, það er alveg rétt og það má kalla þetta vonbrigði,“ sagði Jón Rúnar í Sportpakkanum á Stöð 2.

,,Það eru vonbrigði þegar maður nær ekki þeim árangri eða að komast á þann stað sem maður ætlaði sér að vera á. Þetta er niðurstaðan og við vinnum út frá því.“

,,Við höldum áfram þeirri stefnu sem við höfum keyrt hingað til, það er að vera á toppnum og við erum á toppnum þó við séum ekki í Evrópu.“

,,Það er enginn dauði hér, það hefur enginn meitt sig og það eru engin slys. Við ætlum að vera í Evrópu á þar næsta ári og við undirbúum okkur fyrir það.“

Jón ræddi svo þjálfara FH, Ólaf Kristjánsson en hann mun halda áfram með liðið þrátt fyrir erfitt gengi.

,,Auðvitað eins og í öllu geturðu klínt einhverju á hann hér og þar en heilt yfir erum við sáttir og við vissum það að við værum að fara í breytingar. Við héldum að þær myndu taka skemmri tíma en þær gerðu en stundum seinkar hlutunum útaf einhverju.“

Talað hefur verið um að FH sé í fjárhagslegum vandræðum eftir að hafa mistekist að komast í Evrópukeppni en Jón segir því fólki að tjá sig um eitthvað annað.

,,Það er fullt af fólki sem tjáir sig um mikið um okkar fjárhagsmál, fæst af því hefur hugmynd um hvað það er að tala um.“

,,Flest af því sem talar eru úti í skurði með þetta og það væri nú nær að þetta fólk tæki sig nú til og sinnti því sem það hefur vit á.“