Kristján Guðmundsson mun ekki halda áfram þjálfun hjá liði ÍBV í Pepsi-deild karla en þetta staðfesti félagið í dag.

Kristján hefur þótt náð góðum árangri með ÍBV en liðið varð bikarmeistari á síðustu leiktíð undir hans stjórn.

Félagið staðfesti það þó í dag að Kristján hafi ákveðið að segja starfi sínu lausu og róar á önnur mið eftir tímabilið.

Tilkynning ÍBV:

Kristján Guðmundsson þjálfari meistarflokks karla ÍBV hefur tekið þá ákvörðun um að hætta þjálfun liðsins eftir leik liðsins gegn Grindavík á laugardag. Leikmönnum var tilkynnt um þetta eftir æfingu liðsins fyrr í dag.

Síðastliðin 2 ár hefur Kristján unnið gott starf fyrir ÍBV og lagt sitt af mörkum í að gera ÍBV að stöðugu liði í efstu deild.

Undir hans stjórn tókst ÍBV að landa fyrsta titli sínum í 19 ár þegar bikarmeistaratitill vannst 2017 sem færði liðinu sæti í Evrópukeppni en þar tók ÍBV síðast þátt 2013. Ásamt því að landa titli og koma á stöðugleika þá hefur Kristján gefið mörgum ungum uppöldum leikmönnum tækifæri á að stíga sín fyrstu skref í efstu deild.

Knattspyrnuráð ÍBV þakkar Kristjáni fyrir vel unnin störf og óskar honum velfarnaðar í hans næstu verkefnum.