Jón Rúnar Halldórsson, formaður knattspyrnudeildar FH telur að mikið framboð af beinum útsendingum af Pepsi deild karla sé stór ástæða þess að fólk mætir illa á völlinn. Þetta kom fram á X977 í útvarpsþættinum, Fótbolta.net.

Stöð2 Sport er með heimsklassa umfjöllun um deildina og eru margir leikir í beinni útsendingu.

Aðsókn á leiki hefur minnkað mikið á síðustu árum og sumarið í ár hefur ekki verið gott. Félögin í landinu hafa reynt að bæta sína umgjörð en ekkert gerist. Fólk mætir illa og það hefur áhrif á fjárhag liðanna í deildinni.

,,Það er eitt orð yfir þetta, þetta er skelfing,“ sagði Jón Rúnar Halldórsson, formaður knattspyrnudeildar FH um mætinguna í Pepsi deild karla í sumar.

Jón segist ekki hafa neina eina skýringu en hefur þó tilgátu um það. ,,Í dag er ekki ein skýring frekar en einhver önnur, ég hef hins vegar haft skoðun á þessu í mörg ár. Hún er enn sú sama.“

,,Það að þetta sé vinsælt sjónvarpsefni, offramboð. Sérstaklega í svona sumrum, leiðinlegt veður. Þá er besta sætið, sem er slagorð þess sem sýnir þetta, besta sætið. Harðkjarninn mætir en lausafylgið mætir ekki.“

Þáttinn og umræðuna má heyra hér að neðan.