Rúnar Alex Rúnarsson hefur byrjað feril sinn vel í Frakklandi en hann samdi við lið Dijon í sumar.

Rúnar hefur haldið hreinu í þremur af fyrstu sex leikjum deildarinnar og lék í markalausu jafntefli gegn Reims í gær.

Í grein hjá Ligue1.com er fjallað um Rúnar og hans frammistöðu síðan hann kom frá Nordsjælland í sumar.

Talað er vel um íslenska markvörðinn og býst höfundurinn við að Rúnar taki við af Hannesi Þór Halldórssyni í marki landsliðsins á næstunni.

,,Dijon keypti Rúnarsson frá danska félaginu FC Nordsjælland í sumar til að taka við af hinum vinsæla Baptiste Reynet sem fór til Toulouse,“ sagði í greininni.

,,Það er stórt skarð til að fylla en íslenski markvörðurinn hefur klæðst hönskunum vel.“

,,Þetta var í þriðja sinn sem hann heldur hreinu í sex deildarleikjum og nú hlýtur hann að nálgast byrjunarliðssæti í landsliðinu.“