Íslenska landsliðið þurfti að sætta sig við tap á Laugardalsvelli í kvöld er liðið mætti Belgíu í Þjóðadeildinni.

Leiknum lauk með 3-0 sigri Belga en Romelu Lukaku og Eden Hazard sáu um að tryggja gestunum sigur.

Hér má sjá það góða og slæma úr leiknum.

Plús:

Það var frábært að sjá Kolbein Sigþórsson snúa aftur á völlinn með landsliðinu. Hefur upplifað erfiða tíma en við þurfum svo sannarlega á honum að halda.

Rúnar Már Sigurjónsson byrjaði sinn fyrsta keppnisleik og kom vel út. Einn besti maður íslenska liðsins.

Þetta var allt öðruvísi leikur en 6-0 tapið gegn Sviss. Leikmennirnir gáfust ekki upp þrátt fyrir 3-0 tap.

Íslenska liðið byrjaði virkilega vel í dag. Við vorum meira með boltann alveg í byrjun og fékk Gylfi Þór fínt færi, þetta leit vel út í byrjun.

Mínus:

Þrátt fyrir góða byrjun vorum við ekki lengi að falla aftar og aftar á völlinn. Það var óþarfi svona snemma.

Að fá á sig níu mörk í tveimur leikjum er algjörlega óásættanlegt. Það er ekki líkt þessu landsliði sem hefur náð stórkostlegum árangri.

Íslenska liðið bar alltof mikla virðingu fyrir belgíska liðinu og þá sérstaklega Eden Hazard sem var besti maður vallarins í kvöld.

Þetta var fyrsta tap Íslands á Laugardalsvelli í fimm ár. Síðast töpuðum við keppnisleik hér heima árið 2013.

Það þarf eitthvað að breytast. Erik Hamren virðist ekki vera með hlutina á hreinu eins og er en það þarf að gefa manninum tíma.