Eftir að hafa verið fjarverandi í rúm tvö ár frá landsliðinu vegna meiðsla þá snéri Kolbeinn Sigþórsson aftur til baka í kvöld.

Kolbeinn lék í rúmar tuttugu mínútur í 0-3 tapi gegn Belgíu og Erik Hamren hrósar honum mikið.

,,Ég hef verið mjög sáttur með það sem ég hef séð frá honum, hann hefur bætt sig með hverri æfingunni,“ sagði Hamren.

,,Hann er í erfiðri stöðu og fékk ekki að æfa með Nantes áður en hann kom til liðs við okkur, hann er í góðu standi.“

,,Hann er verkjalaus í líkamanum, ég er glaður fyrir hans hönd. Þú sást brosið á honum, hann hefur brosað á öllum æfingum. Ég vona að hann komi til baka hjá Nantes og fái að spila.“

,,Að mínu viti er hann frábær leikmaður, ef hann kemur sér í stand og spilar hjá Nantes þá verður hann góður leikmaður fyrir okkur. Hann elskar að spila fótbolta, leikmaður sem hefur verið með endalausa verki og er núna verkjalaus, það er gefur honum mikið.“