Gary Mabbutt, fyrrum landsliðsmaður Englnads, lenti í hræðilegu atviki fyrir nokkrum vikum en hann var staddur í Suður-Afríku í fríi.

Þessi 57 ára gamli Englendingur þurfti að fljúga heim til Bretlands og eyddi viku á sjúkrahúsi að jafna sig eftir aðgerð.

Rotta fór illa með Mabbutt er hann var sofandi en hún beit og nagaði í löppina á honum sem skildi eftir sig stórt gat.

Mabbutt var afar öflugur varnarmaður á sínum tíma og lék yfir 400 leiki fyrir Tottenham. Hann spilaði þá 16 landsleiki fyrir England.

,,Eftir alla þessa mótherja og nú loksins er ég tekinn út af rottu,” sagði Mabbutt í samtali við BBC.

,,Ég hafði farið að sofa og um nóttina kom rottan inn í svefnherbergið mitt. Hún klifraði upp í rúmið og byrjaði að naga í löppina á mér.”

,,Ég er með ansi stórt gat á tánni sem nær alla leið að beini og hún át einnig botninn á fætinum.”

,,Hún beit líka þumalputtann á dóttur minni í hinu herberginu. Hún kom inn til mín og sagði mér að ‘eitthvað hafi bitið sig.’ Þú hugsar aðallega um sporðdreka og snáka í Afríku.”