Það var boðið upp á ótrúlega endurkomu í Evrópudeildinni í kvöld er Zenit frá Rússlandi mætti Dinamo Minsk frá Hvíta-Rússlandi.

Zenit er mun sterkara lið á blaði en Dinamo vann fyrri leik liðanna mjög óvænt heima með fjórum mörkum gegn engu.

Zenit var því í mjög erfiðri stöðu fyrir seinni leikinn í kvöld en eins og oft áður í boltanum má aldrei segja aldrei.

Zenit gerði fjögur mörk í venjulegum leiktíma og tryggði framlengingu en Artem Dzyuba, landsliðsframherji Rússa, gerði tvö þeirra.

Dinamo svaraði fyrir sig í framlengingunni og komst yfir og var því á leið áfram á mörkum skoruðum á útivelli.

Zenit skoraði hins vegar fjögur mörk á aðeins 11 mínútum í síðari hálfleik framlengingarinnar og vann leikinn 8-1!

Þetta er stærsta endurkoma Evrópudeildarinnar í 33 ár og því um ótrúleg úrslit að ræða.