Juan Mata, leikmaður Manchester United, er gull af manni en hann tók að sér fallegt verkefni fyrir ári síðan.

Mata ákvað þá að gefa eitt prósent af launum sínum til góðgerðarmála en knattspyrnumenn fá venjulega afar vel greitt fyrir sín störf.

Mata hóf þessa baráttu einn en fjölmargir íþróttamenn hafa síðan þá tekið þátt og gefa eitt prósent af sínum launum til að styrkja gott málefni.

Rúnar Alex Rúnarsson og Frederik Schram, landsliðsmarkverðir Íslands, eru á meðal þeirra sem hafa tekið þátt í þessu frábæra verkefni Mata.

Rúnar spilar með liði Dijon í Frakklandi en hann samdi við félagið í sumar. Frederik er á mála hjá FC Roskilde í Danmörku.

Leikmenn á borð við Kasper Schmeichel, Mats Hummels, Shinji Kagawa, Serge Gnabry og Alfie Mawson eru einnig komnir í hóp þessara leikmanna.

Hér fyrir neðan má sjá alla þá sem hafa ákveðið að leggja sitt af mörkum og hjálpa þeim sem eiga minna til.