Santi Cazorla spilaði með Villarreal í gær er liðið mætti Hercules í æfingaleik á Spáni. Cazorla kom inná sem varamaður í leiknum.

Cazorla gekk í raðir Villarreal í sumar en hann hefur undanfarin ár verið á mála hjá enska liðinu Arsenal.

,,Ég er mjög ánægður með að vera kominn til baka að gera það sem ég elska mest. Það er mikil vinna eftir en þetta er fyrsta skrefið,“ sagði Cazorla í gær.

Cazorla hefur verið að glíma við erfið meiðsli í langan tíma en hann spilaði síðast leik tímabilið 2016/2017.

Spánverjinn kom við sögu í 11 leikjum Arsenal það tímabil en meiðsli settu eins og áður strik í reikning leikmannsins.

Cazorla spilaði sinn fyrsta leik í 636 daga í gær fyrir Villarreal en hann hóf einmitt ferilinn hjá spænska félaginu.