Ronaldo, fyrrum leikmaður Real Madrid og Brasilíu, segir að hann hafi rætt við landa sinn Neymar fyrir nokkrum árum og spurt hann út í af hverju hann fer oft auðveldlega niður í leikjum.

Neymar er oft ásakaður um það að henda sér auðveldlega í grasið og var mikið talað um það á HM í Rússlandi í sumar.

Ronaldo segir að Neymar sé að reyna að koma í veg fyrir alvarleg meiðsli og viðurkennir að hann hafi lent í svipaðri stöðu á sínum ferli.

,,Ég spurði hann út í þetta fyrir fimm árum og hann útskýrði það fyrir mér að það sé oft sparkað í hann og þá bregst hann svona við til að koma í veg fyrir frekara högg,“ sagði Ronaldo.

,,Það var líka þannig hjá mér. Mér leið oft eins og það væri ekki komið heiðarlega fram við mig þegar það var ítrekað sparkað í mig og dómarinn flautaði ekki.“

,,Neymar verður að hafa betri stjórn á tilfinningunum í leikjum. Hann tekur of mikla áhættu með að fá gul spjöld. Hann þarf að nýta sér þessa neikvæðni betur og sýna meiri illsku.“