Valur vann sigur á Rosenborg frá Noregi í kvöld er liðin áttust við á Origo-vellinum á Hlíðarenda.

Aðeins eitt mark var skorað í leiknum en það gerði Eiður Aron Sigurbjörnsson fyrir íslenska liðið í síðari hálfleik.

Hér má sjá það góða og slæma úr frábærum sigri Vals.

Plús:

Íslendingar standa með Val í þessari viðureign, sama með hvaða liði við höldum! Megum vera stolt af þessu.

Þetta eru stærri úrslit en kannski margir gera sér grein fyrir. Rosenborg er sigursælasta lið Noregs og hefur unnið deildina 25 sinnum.

Þrátt fyrir það voru Valsmenn bara mjög góðir í kvöld. Létu þá norsku ekki yfirspila sig og vildu spila sinn fótbolta.

Stemningin á Origo-vellinum var meiriháttar. Það var sungið og kallað allan leikinn, gefur leikmönnum mikið.

Valsmenn höndluðu pressu norsku leikmannana mjög vel. Pressan var mikil um tíma en menn voru yfirvegaðir og sáu þetta út.

Mínus:

Það er eiginlega ekki hægt að segja neitt slæmt um þennan leik. 1-0 forysta er þó hættuleg og Rosenborg er sterkt á heimavelli.

Ég hefði viljað annað mark frá Valsmönnum, þeir norsku voru svolítið ‘shaky’ til baka. Tobias Thomsen átti skot í stöng en lengra komust þeir rauðu ekki.

Mig grunar að hrokinn hafi verið mikill hjá leikmönnum Rosenborg, þeir bjuggust við auðveldum leik. Hafa þeir aldrei séð leik með íslenska landsliðinu? Kemur ekki hingað og færð eitthvað gefins þó að pappírinn segi þér annað.