Eins og við greindum frá í gær mun Guðmundur Benediktsson ekki lýsa úrslitaleik HM á sunnudaginn. Í stað hans mun Haukur Harðarson lýsa leiknum ásamt Bjarna Guðjónssyni. Almenn óánægja virðist vera með þetta fyrirkomulag og hafa margir tjáð sig um málið á samfélagsmiðlum.
Sjá einnig: Reiði yfir engum Gumma Ben á lokaleiknum:„Farðu heim RÚV, þú ert orðið ósjálfbjarga af ölvun“
Á Facebook-síðu Fréttablaðsins, sem greindi fyrst frá, má sjá talsverða óánægju með þetta. „Æ Æ! Af hverju ekki Gummi? Þarf maður þá að horfa á norska sjónvarpið,“ skrifar einn maður. Annar skrifar: „Mætti ég biðja um GB!“.
Blaðamaður Fréttablaðsins, Sigurður Mikael Jónsson tjái sig einnig um málið og gagnrýndi Rúv harðlega á Twitter-síðu sinni: „Farðu heim RÚV, þú ert orðið ósjálfbjarga af ölvun. Veist ekkert í þinn haus. Gleymdu þessu! Hvar er undirskriftasöfnunin?“
Eftir að málið komst í hámæli í gær ákvað samstarfskona Hauks, Edda Sif Pálsdóttir að koma sínum manni til varnar á Twitter. „Þetta fólk sem er froðufellandi yfir því hvort Haukur eða Gummi lýsi úrslitaleiknum Er hægt að fá þessa sérfræðinga í eitthvað fleira?!“ skrifaði Edda Sif í færslu sem sjá má hér að neðan.
Í kjölfarið fóru af stað umræður þar Eddu var bent á að málið kæmi öllum við þar sem um stærsta sjónvarpsviðburð heims væri að ræða. Einn af þeim sem tók þátt í umræðunum er blaðamaður Vísis, Tómas Þór Þórðarson var fyrstu til að svara Eddu Sif og stakk uppá eftirfarandi fyrir þá sem gagnrýna að Haukur lýsi leiknum:
„Fá þá? Þeir eru á fullu allan daginn alla daga; Ljósmæður, Borgarpólitíkin, Hvalveiðar, matarsóun. Skoðanir á öllu. Okkar duglegasta fólk.“
Edda Sif var ekki lengi að svara því og sagði umræðuna vera á lágu plani. „En þessi dónaskapur, heift og blammeringar eru alveg út úr kortinu og engum til framdráttar,“ skrifaði Edda meðal annars.
Auðvitað má fólk hafa skoðun á hverju sem það vill og það er allt annað. En þessi dónaskapur, heift og blammeringar eru alveg út úr kortinu og engum til framdráttar.
— Edda Sif Pálsdóttir (@EddaSifPalsd) July 11, 2018
