Guðmundur Benediktsson, fyrrum landsliðsmaður, var gestur í hlaðvarpsþætti Hjörvars Hafliðasonar, Dr. Football í dag.

Gummi Ben eins og hann er kallaður var hæfileikaríkur knattspyrnumaður á sínum tíma og reyndi á meðal annars fyrir sér erlendis í Belgíu með liði Geel.

Framherjinn átti einnig farsælan feril með Val og KR hér heima og á þá að baki 10 landsleiki fyrir Ísland.

Okkar ástsælasti knattspyrnulýsandi gaf börnum góð ráð í þættinum og útskýrði hvernig maður færi að því að ná árangri í íþróttinni.

,,Maður elskaði það að vera í fótbolta. Í sjötta og fimmta flokki þá áttaði maður á sig að maður hefði eitthvað auka,“ sagði Gummi Ben.

,,Ég held að það trufli mjög fá börn, hvort sem þau bera af eða ekki. Það er bara love of the game að fá að vera í fótbolta í allan sólahringinn og þannig var bara lífið.“

,,Ég hef heyrt þig oft tala um það að ég væri matargikkur en ég held að það hafi mest megnis útaf því að ég fór út í fótbolta þegar ég vaknaði og það þurfti að ná í mig þegar ég átti að fara að sofa.“

,,Maður kom ekkert heim og borðaði eiginlega ekkert. Maður var upptekinn í því að spila fótbolta. Ég held að það sé lykillinn fyrir þá sem vilja ná árangri að æfa nógu andskoti mikið.“