Ólafur Jóhannesson, þjálfari Vals, gat sætt sig við stig á KR-velli í kvöld er hans menn gerðu 1-1 jafntefli við þá svarthvítu.

Ólafur byrjaði viðtalið eftir leik á að leiðrétta spyrilinn sem talaði um stigið sem punkt.

,,Þetta heitir stig, ekki punktur. Þetta var ekki okkar besti leikur en við vorum duglegir og lögðum mikla orku í þennan leik,“ sagði Ólafur við Stöð 2 Sport.

,,Þetta var erfitt fyrir okkur, sérstaklega einum færri en við fengum reyndar gott færi, Ívar er vanur að setja hann þarna. Við vorum duglegir varnarlega og stigið er gott.“

Eiður Aron Sigurbjörnsson fékk að líta rautt spjald hjá Val í dag en hann fékk tvö gul spjöld. Ólafur telur að dómurinn hafi verið réttur. Hann var hins vegar ósáttur með að sex mínútum væri bætt við undir lok leiksins.

,,Pétur er okkar besti dómari svo ég held að þessi ákvörðun hafi verið rétt.“

,,Þetta var hálfur hálfleikur [sem hann bætti við], okkur fannst það mikið en þegar maður er í basli vill maður ekki mikinn uppbótartíma.“

,,Við spilum ekki okkar besta leik en fáum stig á erfiðum útivelli gegn góðu KR liði.“