Nígeríska landsliðið mætir til leiks gegn Íslandi í Volgograd í dag með fjóra ósigra á bakinu í síðustu fimm leikjum. Síðasti sigurleikur þeirra kom þó gegn sterku liði Pólverja í vináttuleik í mars, 1-0.

Síðan þá hafa þeir spilað fimm leiki; fjóra vináttuleiki og svo leikinn gegn Króatíu sem tapaðist 2-0. Eftir sigurinn gegn Póllandi, sem stillti upp sterku liði, kom 2-0 tapleikur gegn Serbíu nokkrum dögum síðar.

Liðið gerði svo jafntefli gegn Kongó, 1-1, í vináttuleik í lok maí. Svo tapaði liðið gegn Englandi, 2-1 og svo gegn Tékklandi, 1-0, í æfingaleikjum fyrir HM.

Áður en að þessari fimm leikja hrinu án sigurs kom hafði nígeríska liðið verið á fínu róli, ef undan er skilinn 4-0 tapleikur gegn Marokkó í úrslitaleik Afríkukeppninnar í janúar. Ekki var um hina hefðbundnu Afríkukeppni að ræða þar sem lið máttu aðeins stilla upp leikmönnum sem spila í sínum heimalöndum. Nígería mætti því ekki með sitt sterkasta lið til keppni, ekki frekar en önnur lið.

Í nóvember í fyrra mættust Argentína og Nígería í vináttuleik og lauk þeim leik með 4-2 sigri Nígeríu. Leikurinn fór fram í Krasnodar í Rússlandi og stilltu bæði lið upp mjög sterkum liðum, þó Lionel Messi hafi vantað í argentínska liðið.

Nígería var í sterkum riðli í undankeppni HM í Afríku og vann sinn riðil sem Alsír, Sambía og Kamerún voru einnig í. Nígería vann riðilinn með talsverðum yfirburðum, fékk 13 stig og komst beint í lokakeppni HM. Eini tapleikur Nígeríu í riðlinum kom gegn Alsír en leiknum hafði reyndar lokið með 1-1 jafntefli. Alsíringum var dæmdur 3-0 sigur þar sem Nígeríumenn tefldu fram ólöglegum leikmanni í leiknum.