Stálkona Íslands, Veiga Dís Hansdóttir segir mikla áskorun fólgna í því að keppa um titilinn Sterkasta kona Íslands, en sú keppni verður haldin um helgina.
Veiga Dís ræðir við Lindu Blöndal í þættinum 21 á Hringbraut í kvöld, um hvað heldur henni gangandi og hvað þarf til þess að hljóta titla eins og þessa.
Mótið um Sterkustu konu Íslands fer frá á laugardaginn 15. ágúst á Akureyri.
Veiga Dís, sem er húsasmiður og smíðakennari í grunnskóla Varmárskóla segist allt hafa byrjað æfingar með bræðrum sínum.
Hún segir mjög misjafnt í hverju er keppt á hvaða mótum og fer yfir keppnisgreinarnar í Stálkonunni.
„Það er rosaleg misjafnt eftir mótum hvaða greinar eru á mótinu. Í Stálkonunni þá tókum við Bóndagöngu þar sem haldið er á stórum járnklumpum og gengið eins hratt og hægt er. Einnig sirkúslóð, sem eru stór lóð, stærra en mannshöfuð, sem maður heldur bara uppi með annarri hendi og tekur upp og niður frá jörðinni, eins oft og maður getur á mínútu. Og svo er það réttstöðulyfta sem ég held að allir kannist við, svo hlupum við með þungar hellur og síðasta greinin var Atlassteinar. Það eru svona stórir gúmmísteinar sem maður lyftir upp á pall. Léttasti atlasteinninn var um 60 kg og annar um 90 kg og 110 kg,“
Um helgina mun Veiga keppa um titilinn Sterkasta kona Íslands. Níu konur eru skráðar, sem Veiga segir að sé mikið.
„Sem er rosalega mikið. Ég var einmitt að vinna á Sterkasta manni Íslands síðustu helgi og það voru ekki nema sjö keppendur, þannig að við erum fleiri en karlarnir“
Um áhugann á aflraunakeppnum í dag segir Veiga Dís: „Ég myndi klárlega segja að hann væri vaxandi“
Þáttinn má sjá á Hringbraut klukkan 21 í kvöld