Forráðamenn enska úrvalsdeildarliðsins Manchester United, telja sig geta tekið á móti 23.500 áhorfendum með tilliti til fjarlægðartakmarkana, um leið og bresk stjórnvöld gefi grænt ljós á að áhorfendur geti snúið aftur á knattspyrnuvelli.
Til stóð að hleypa áhorfendum aftur á leiki í Englandi í október. Hins vegar er önnur bylgja Covid-19 veirunnar í mikilli sveiflu víðs vegar um Evrópu og var því horfið frá þeim áformum,
Collette Roche, yfirmaður aðgerðarsviðs Manchester United, segir að félagið sé búið að hugsa fyrir öllu varðandi örygggi stuðningsmanna er þeir snúi aftur á völlinn.
„Við vorum vonsvikin með að það var horfið frá fyrirhuguðum áætlunum í október, vegna þess að við erum fullviss um að geta tryggt öryggi stuðningsmanna á Old Trafford,“ sagði Roche við SkySports.
Roche finnst illa vegið að knattspyrnuáhorfendum í samanburði við aðra hópa.
„Mér finnst það orka tvímælis að fólk geti safnast saman í flugvélum eða veitingahúsum og geti jafnvel farið í kvikmyndahús til að horfa á fótboltaleik. Við erum búin að hugsa fyrir öllu hér og vitum að við getum tekið á móti stuðningsmönnum á leikdegi með öruggum hætti.“ sagði Roche.