Ragnar Sigurðsson, varnarmaður íslenska liðsins, var besti leikmaður vallarins í 2-1 sigri Íslands gegn Englandi. Ragnar sýndi eina flottustu frammistöðu leikmanns í mótinu hingað til og var að öðrum ólöstuðum besti leikmaður Íslands í annars frábæru liði.

„Við erum bara með trú og vilja sem ekkert annað lið hefur og við vorum óheppnir að vinna ekki stærra,“ sagði Ragnar í viðtali við Pétur Marteinsson eftir leik.

Ragnar sagði að það væri ekkert öðruvísi að mæta leikmönnum enska landsliðsins en einhverjum öðrum. Það myndi ekki þýða að hugsa þannig. „Nei, það þýðir ekkert í svona leikjum þó þetta séu gaurar sem maður horfir á í sjónvarpinu. Mér er drullusama hverjir þeir eru.“

Heimir Hallgrímsson, landsliðsþjálfari Íslands, sagði að Ragnar hefði með spilamennsku sinni sett ný viðmið. Frammistaða hans gegn enska liðinu í kvöld hlyti að vekja athygli stærstu félagsliða heims.

Þegar Ragnar var spurður hvað hann myndi segja barnabörnum sínum í framtíðinni svaraði Ragnar af bragði að hann myndi segja þeim að hann hefði verið nálægt því að skora úr hjólhestaspyrnu gegn Englandi. Ragnari lýst vel á að mæta Frakklandi, gestgjöfum keppninnar, í 8-liða úrslitunum á sunnudag.

Hann hefur tröllatrú á að íslenska liðið geti unnið það franska.

„Það er bara flott að mæta þeim á heimavelli. Við höldum áfram. Það er allt hægt, þú sást það í dag.“