Victor Sibson banaði unnustunni en ekki sjálfum sér
Victor Sibson, 21 árs karlmaður í Anchorage í Alaska, hefur verið ákærður fyrir manndráp eftir að hann banaði unnustu sinni.
Það var síðastliðinn föstudag að Sibson, sem setið hafði að sumbli, tók þá ákvörðun að svipta sig lífi með skotvopni. Unnusta hans, Brittany-Mae Haag var með honum þegar atvikið varð og reyndi að fá hann ofan af þessari afdrifaríku ákvörðun.
Í frétt KTVA kemur fram að Sibson hafi engu að síður beint byssunni að höfði sér, tekið í gikkinn og fór kúlan í höfuð hans vinstra megin áður en hún rataði út. Svo skelfilega vildi til að kúlan fór úr höfði Sibsons og í brjóstið á Brittany sem lést af sárum sínum en Sibson komst lífs af.
Saksóknarar telja að Brittany hafi reynt að ná skotvopninu af unnusta sínum þegar skotið hljóp úr byssunni. Saksóknarar létu það í hendur kviðdómenda að ákvarða hvort Sibson yrði ákærður fyrir manndráp af fyrstu eða annarri gráðu, en niðurstaðan var sú að ákæra hann fyrir manndráp af annarri gráðu.
Sibson kom fyrir dómara á sunnudag þar sem fram kom að hann þyrfti að greiða 250 þúsund dala tryggingu til að ganga laus. Hann sagðist ekki hafa efni á því og spurði dómara hvort hægt væri að taka ákvörðun um það samdægurs hvort hann væri sekur eða saklaus. Það reyndist ekki unnt og þarf Sibson því að bíða eftir að vita örlög sín.