Brauð er fastur hluti af mataræði margra, sérstaklega í morgunmat, enda er það bragðgott og auðvelt að byrja daginn með því að borða brauð. En er óhollt að borða brauð daglega?

Raquel Antunes, næringarfræðingur hjá Grupo Valsa í Rio de Janeiro í Brasilíu, segir að áhrif brauðneyslu tengist því hvernig brauð er borðað og hvernig það fellur inn í mataræðið.

Að sögn Globo sagði hún að ofurunnin brauð, sem eru úr hveiti og innihalda mikið af viðbættum efnum, innihaldi yfirleitt lítið af trefjum og hækki blóðsykurinn, sem dregur úr næringargildi brauðsins.

Þetta gerir að verkum að brauð er oft tengt við þyngdaraukningu því það getur hækkað blóðsykurinn og dregið úr mettunartilfinningu vegna skorts á trefjum.

Á hinn bóginn inniheldur heilhveitibrauð, með kjörnum, fræjum eða höfrum, meira af trefjum sem styrkja mettunartilfinninguna og hjálpa til við að koma jafnvægi á blóðsykurinn. Svona brauð hentar betur til daglegrar neyslu.

Antunes sagði að það sé engin ein regla um hversu mikið brauð sé óhætt að borða daglega því það verði að líta á þetta í samhengi við lífsstíl, næringarþörf, heilsufar og hvernig brauð er borðað.

Hún sagði að manneskja, sem hreyfir sig mikið, geti innbyrt meira af kolvetnum á dag en manneskja sem glímir við sykursýki eða efnaskiptavanda.