Lara Trump, tengdadóttir Donald Trump, heyrði af þessu og ákvað að að skýra frá sannleikanum hvað þetta varðar í hlaðvarpinu sínu.
Hún sagðist hafa rekist á mörg myndbönd og færslur um Barron Trump en ein samsæriskenning hafi skorið sig úr og henni vilji hún svara.
Barron, sem er tvítugur, hefur, ólíkt öðrum í fjölskyldunni, látið lítið fyrir sér fara og það er kannski ástæðan fyrir að fólk hefur svo gaman af að tala um hann og búa til samsæriskenningar.
Samsæriskenningin, sem Lara vísaði til, gengur út á að Barron sé tímaferðalangur.
„Ég vil ekki eyðileggja neitt fyrir neinum hér, en Barron Trump er ekki tímaferðalangur. Mér þykir miður að segja þetta og ég er leið yfir að ég hafi kramið mörg hjörtu í dag,“ sagði hún að sögn The Independent.
Hún sagði að þessi samsæriskenning sé skýrt merki um hversu mikla dreifingu og athygli ótrúlegar samsæriskenningar geta fengið á samfélagsmiðlum.
Hún sagði einnig að hún hafi þekkt Barron í mörg ár og sé því fullviss um að þessi samsæriskenning eigi ekki við rök að styðjast.
Mörgum þykir þessi kenning þó geta verið rétt og vísa í gamla skáldsögu frá lokum nítjándu aldar en í henni kemur maður að nafni Barron Trump við sögu og vilja sumir því tengja þessa fortíð við nútíðina.
