Allt om Mat skýrir frá þessu og bendir á að margir velji skurðarbretti úr plasti því það er auðvelt að þrífa þau. Það er hægt að setja þau í uppþvottavélina við háan hita sem gerir að verkum að þau eru vel þrifin.
Svo er til lífplast, sem er búið til úr hráefnum á borð við maís og sykurreyr í stað olíu.
Tré er náttúrulegt efni sem margir kjósa frekar en plast. Trébretti fara betur með hnífana en plastbrettin og þeir bíta lengur ef maður sker á þeim í stað plastbretta.
Svo er auðvitað hægt að nota trébrettin til að bera matinn fram á.
En báðar gerðirnar hafa sína ókosti. Bakteríur geta safnast upp í trébrettinu, sérstaklega ef það eru sprungur eða rispur á því. Það þarf því að passa að þrífa það mjög vel, þurrka vel og hugsa vel um það á allan hátt.
Plast slitnar með tímanum og ef greinileg notkunarmerki sjást á því eða það verður mislitt, þá er kominn tími til að skipta því út. Slitið yfirborð þess getur gert manni erfiðara fyrir við að þrífa það og örplast getur borist í matinn.
