Matteo þessi var um árabil foringi hinnar alræmdu Cosa Nostra-mafíu á Sikiley og var um tíma í hópi þeirra manna sem ítalska lögreglan lagði hvað mesta áherslu á að handsama. Það gekk þó ekki hratt fyrir sig en hann var handtekinn í janúar 2023 og lést hann af völdum krabbameins síðar það ár.
Saksóknarar á Ítalíu segja að aðgerðin sé þungt högg fyrir tilraunir sikileysku mafíunnar til að endurreisa fjárhagslegan styrk sinn.
Meðal þeirra eigna sem gerðar voru upptækar eru meira en 12 kíló af gullstöngum, milljónir evra í reiðufé, dýr lúxusúr og um tuttugu verðmætar fasteignir.
Aðgerðirnar eru hluti af umfangsmikilli rannsókn á fjárstreymi sem talið er tengjast fíkniefnaviðskiptum mafíunnar. Þrír einstaklingar voru handteknir í tengslum við málið.
Yfir 150 starfsmenn ítölsku efnahagsbrotalögreglunnar tóku þátt í húsleitum bæði innan Ítalíu og erlendis. Aðgerðir fóru meðal annars fram í Andorra, Gíbraltar, Cayman-eyjum, Sviss, Líbanon, Mónakó og á Spáni.
Með handtöku Denaro á sínum tíma var endir bundinn á þriggja áratuga flótta hans undan yfirvöldum. Hann hafði áður verið dæmdur í fjarveru fyrir fjölda morða og var meðal annars talinn hafa átt þátt í skipulagningu tveggja sprengjuárása árið 1992 þar sem tveir fremstu saksóknarar Ítalíu í baráttunni gegn mafíustarfsemi í landinu létust.
