McCrary, sem er þekkt á samfélagsmiðlum undir nafninu Slightlyoff.balance, greindi frá málinu á TikTok og Instagram þar sem hún deildi upptökum úr búkmyndavél lögreglu.
McCrary var sektuð vegna málsins þann 11. febrúar síðastliðinn í Palm Beach-sýslu í Flórída. Eins og myndbandið hér að neðan ber með sér taldi lögreglumaður að McCrary hefði haldið á farsíma í hægri hendi meðan hún ók eftir North Dixie-þjóðveginum.
Hún fékk sekt samkvæmt lögum í Flórída um notkun síma undir stýri við akstur og nam sektin 116 dölum, rúmum 14 þúsund krónum.
McCrary, sem hefur frá fæðingu verið án hægri handar og hefur lengi fjallað opinskátt um líf sitt og reynslu á samfélagsmiðlum, birti síðar myndband þar sem hún lýsti furðu sinni á atvikinu. Myndbandið vakti mikla athygli og hvöttu ófáir netverjar hvöttu hana til að fara alla leið með málið til að fá sektina fellda niður.
Í upptökum úr búkmyndavél lögreglumannsins má heyra hann útskýra að hún hafi verið stöðvuð fyrir að halda á síma í hægri hendi. McCrary lyftir þá hægri handleggnum upp og svarar: „Augljóslega ekki,“ áður en hún hlær og spyr hvort ekki sé best að láta málið þar við sitja.
Lögreglumaðurinn stóð þó fast á sínu og ítrekaði að hann hefði séð hana með símann í hendinni. McCrary reyndi að malda í móinn en hafði ekki erindi sem erfiði.
McCrary mætti fyrir dóm í lok apríl og neitaði sök. Til stóð að þinghald færi fram aftur 27. maí, en samkvæmt bandaríska miðlinum CBS 12 óskaði lögreglumaðurinn sjálfur eftir því að málið yrði fellt niður áður en til þess kom.
Í færslu á Instagram staðfesti McCrary að sektin hefði verið felld niður vegna skorts á sönnunargögnum. Málið hefur vakið talsverða athygli vestanhafs og margir gagnrýnt þrjósku lögreglu í tengslum við málið.
@slightlyoff.balance Merry Christmas! Tas the night before court…. #bodycam #palmbeach #court #florida ♬ original sound – slightlyoff.balance
