Námuverkamenn í Mjanmar fundu nýlega 11.000 karata rúbín sem vegur um 2,2 kíló. Gæði rúbínsins þykja mjög mikil sem og litur hans.

Þetta er talinn vera næst þyngsti rúbíninn sem fundist hefur í þessu stríðshrjáða landi.

Sky News segir að hann hafi fundist nærri bænum Mogok í Mandalay-héraðinu en það er stærsta námusvæði landsins.

Stærsti rúbíninn, sem fundist hefur í landinu, fannst 1996. Hann var 21.450 karöt og vóg 4,29 kíló. Sá nýfundni er þó verðmætari vegna glæsilegs litar hans og gæða.

Um 90% af rúbínum heimsins koma frá Mjanmar og er vinnsla þeirra og annarra verðmætra steintegunda mikilvæg tekjulind fyrir landið.