Rússnesk stjórnvöld íhuga núna lagabreytingu sem getur haft víðtæk áhrif á evrópska bíleigendur. Í lagafrumvarpi, sem innanríkisráðuneytið vinnur að, er lagt til að bílar, sem eru skráðir stolnir í alþjóðlegum gagnabanka, geti framvegis fengið skráningu í Rússlandi ef rússneskir ríkisborgarar eru með þá.

Þýski miðillinn Merkur skýrir frá þessu og byggir á umfjöllun Moscow Times.

Þessi hugmynd Rússa vekur áhyggjur því þetta mun gera misindismönnum auðveldara fyrir að selja bíla frá ESB í Rússlandi.

Ástæðan fyrir tillögunni tengist sterklega pólitískri spennu á milli Rússlands og Vesturlanda vegna innrásar Rússa í Úkraínu.

Rússnesk yfirvöld segja að samstarfið við Vesturlönd vegna stolinna bíla sé lítið sem ekkert. Segja Rússar að fyrirspurnum, um fjölda bíla sem fundust í Rússlandi og séu á alþjóðlegum listum yfir stolna bíla, hafi ekki verið svarað af Vesturlöndum.