Það þarf ekki að leita lengi á samfélagsmiðlum til að finna myndbönd af óánægðum Rússum. Lokað hefur verið fyrir Internetið í hluta Moskvu. Þetta eru bara tveir af undarlegum atburðum sem hafa átt sér stað í Rússlandi að undanförnu.
Erlendir fjölmiðlar á borð við The Sun, Daily Mirror og aol hafa fjallað um að hugsanlega sé valdarán í undirbúningi.
Á bak við það er Sergei Shoigu, fyrrum varnarmálaráðherra, sagður standa. Hann var lengi einn nánasti trúnaðar- og samstarfsmaður Pútíns. Muna eflaust margir eftir ljósmyndum af þeim saman, berum að ofan, við veiðar í Tuva.
Shoigu var lækkaður í tign af Pútín 2024 og segja orðrómar í Moskvu að vinátta þeirra hafi beðið hnekki við þetta. Það kom kannski vel í ljós fyrir nokkrum vikum þegar náinn bandamaður Shoigu, Ruslan Tsalikov, var handtekinn, sakaður um spillingu.
En svo virðist sem fjöldi vandamála innanlands hafi haft í för með sér að óánægjan með Pútín hefur náð nýjum hæðum. Það þarf ekki að koma á óvart að megnið af þessu tengist stríðinu í Úkraínu.
Svo virðist sem margir Rússar hafi nú áttað sig á að stríðið muni vara lengi og að það sé erfitt. Það bætir ekki úr skák að Pútín lét loka fyrir samfélagsmiðilinn Telegram. Það hefur komið illa niður á hernaðinum í Úkraínu því hermenn hafa notað samfélagsmiðilinn við skipulagningu hernaðarins.
Þessu til viðbótar kemur að gríðarlegu fjöldi Rússa hefur fallið á vígvellinum í Úkraínu. Bensínverð hefur hækkað sem og verð á gasi. Miklu minna úrval er af vestrænum varningi í verslunum en fyrir stríð.
Sérfræðingar segja að allt þetta geti verið eitraður kokteill fyrir Pútín. Sífellt fleiri merki sjáist um að almenningur sé orðinn þreyttur á stríðinu og áhrifum þess á daglegt líf hans.
