The Mirror skýrir frá þessu og segir að Barron hafi stundað nám við dýra einkaskóla á Manhattan í New York en hafi hafið nám við New York University 2024 en hafi síðan fært sig um set til Washington D.C. síðasta haust þar sem hann stundar nám við útibú New York University.
Barron er þekktur fyrir að halda sig utan sviðsljóssins og vera mjög hlédrægur. Hann er sagður sýna sífellt meiri áhuga á að verða frumkvöðull. Heimildarmaður, sem stendur honum nærri, sagði í samtali við People að hann sé nú að undirbúa sig fyrir næsta „tímabil lífsins“ þar sem hann ætli að „finna verkefni sem séu ekki bara áhugaverð, heldur færi honum einnig mikið af peningum“.
Heimildarmaðurinn sagði að Barron hafi erft áhuga föður síns á að græða peninga og skapa sér nafn. Hann sagði að Barron sé ólíkur systkinum sínum að því leyti að hann sé „einfari“. Hann hafi alist upp í sviðsljósinu og líði ekki endilega vel í því. Þetta hafi gert hann að einfara.
Annar heimildarmaður sagði einnig að Barron sé mjög hlédrægur en sé um leið nákvæm eftirmynd föður síns en „sem betur fer laus við hroka hans“. Hann líkist frekar móður sinni að þessu leyti, sé hljóðlátur og fágaður.
