Að hans sögn gætu þær upplýsingar sem honum hafa verið kynntar haft veruleg áhrif á samfélagið ef þær yrðu gerðar opinberar. Greint er frá þessu í New York Post, sem vísar til viðtals Newsmax við þingmanninn.
Burchett, sem situr í verkefnahópi fulltrúadeildarinnar um afléttingu leyndar af alríkisgögnum, sagði í viðtalinu að hann hefði lengi talað fyrir fullri upplýsingagjöf í þessum málum.
„Almenningur á rétt á að vita þetta,“ sagði hann og bætti við að ef það sem hann hefði sjálfur fengið kynningu á yrði birt opinberlega myndi það valda miklum áhyggjum meðal almennings.
Þingmaðurinn sagði að fyrir skömmu hefði honum verið kynnt mál sem tengdist lífi í geimnum. Ef upplýsingarnar kæmu fram opinberlega gæti það haft mikil áhrif á almenning og Bandaríkin „farið úr skorðum“ eins og hann orðaði það.
Hann sagði jafnframt að slíkar upplýsingar hefðu ítrekað verið faldar fyrir almenningi.
Ummæli Burchetts koma í kjölfar yfirlýsinga fyrrverandi þingmannsins Matt Gaetz, sem sagðist á dögunum hafa vitneskju um meintar tilraunir sem tengdust blöndun manna og geimvera. Burchett vildi ekki tjá sig um þær fullyrðingar og vísaði til þess að hann væri enn starfandi þingmaður.
Þá ræddi Burchett einnig um dularfull dauðsföll meðal vísindamanna og sérfræðinga sem tengjast rannsóknum á þessu sviði. Hann nefndi þar meðal annars hvarf fyrrverandi hershöfðingjans William McCasland og eldflaugaverkfræðingsins Monicu Reza.
