Háskóli í Tennessee í Bandaríkjunum mun greiða prófessor við skólann 500 þúsund Bandaríkjadali, rúmar 63 milljónir króna, og láta hann hafa starfið sitt aftur.

Prófessorinn, Darren Michael, var rekinn vegna færslu sem hann birti eftir að íhaldssami áhrifavaldurinn Charlie Kirk var drepinn.

Darren var fastráðinn við Austin Peay State University í Clarksville, en tveimur dögum eftir morðið á Kirk deildi Darren grein frá Newsweek frá árinu 2023. Í henni var haft eftir Kirk að dauðsföll í skotárásum væru ásættanlegur fórnarkostnaður í þágu núverandi byssulöggjafar Bandaríkjanna.

Færsla Michaels vakti harða gagnrýni meðal íhaldsmanna, þar á meðal öldungadeildarþingkonunnar Marsha Blackburn, sem merkti háskólann í Facebook-færslu og spurði: „Hvað segið þið, Austin Peay State University?“

Sama dag sendi háskólarektorinn, Michael Licari, Darren tölvupóst þar sem hann tilkynnti honum að honum hefði verið sagt upp „með tafarlausum hætti“ þar sem færslan hefði skaðað orðspor skólans verulega.

Ekki löngu síðar viðurkenndi skólinn að með þessu hefði verið brotið á réttindum Darrens og er niðurstaðan nú að hann fær starf sitt til baka, 500 þúsund dollara í bætur og þá mun skólinn viðurkenna opinberlega að hafa farið gegn eigin reglum.

Lögmaður Michaels, David L. King, sagði að færsla skjólstæðings síns hefði einfaldlega verið endurbirting á orðum Kirk sjálfs og hélt því fram að háskólinn hefði látið undan pólitískum þrýstingi.